Daw Aung San Suu Kyi ih Bodyguard police second lieutenant Cherry Thet (kum 30) le police lieutenant Pyea Phyo Naing cu September 21 ah an kaih thu theih a si.
February 1 ralkap in rampi thuneihnak an lak zing Daw Aung San Suu Kyi an kaih caan ah a Bodyguard pawl cu kai loin Naypyitaw acozah hnațuan umnak inn ah an ret ih thla 8 a rei hnuah atu bangtukin an kai tiah kiangkap naivai in an sim.
“Annih hi zoh thup deuh pianhmang in an ret, September 18 ihsin an phone an long, September 21 ah an kai” tiah palik naivai mi pakhat in a sim.
CDM cangvaihnak ih teltu ralkap le palik pawlih group a simi Myanmar Police CDM Channel ahcun police second lieutenant Cherry Thet cu Naypyitaw ahmat (1) myoma palik zung ah yazatetgyi pukmah 505 (a) hmangin thubuai an tuahsak tiah an tarlang.
Ralkap council thusimtu Major General Zaw Min Htun cun police second lieutenant Cherry Thet hi ralkap council ih ralhrang tiah a tlangthanmi NUG sungtel hrekkhat thawn pehtlaih awknak an neih ruangah kaih a si tiah a sim. Asina’n police lieutenant Pyea Phyo Ngaing thawn pehparmi thuhla cu zianghman a sim lo.
2015 rampi hrilawknak ah NLD ih nehnak a co hnu party hotu Daw Aung San Suu Kyi cu rampi hruaitu upa țuanvo a kaih lai caan ah a Bodyguard hrangah palik cu Home Affairs Department in an rak ret.
Daw Aung San Suu Kyi ih Bodyguard palik pawl cu atu kaih tongtu Police lieutenant Pyea Phyo Naing in a hoha. Police second lieutenant Cherry Thet cu Daw Aung San Suu Kyi naihniam biktu a siih rampi dinhmun in ramsung ramleng khualtlawn caan ah Daw Aung San Suu Kyi kiangih um ringringtu a si.
Daw Aung San Suu Kyi le police second lieutenant Cherry Thet cu sungkua vekih nel aw zetih an zuk tlangmi pawl social media ih a darh ihsin police second lieutenant Cherry Thet hi mipi ih ngaihven hlawh zettu a si.
