November 11 zinglam ah ralkap hnenih thuhla simtu dalan USDP lemsawm hotu Hmaw Gyi timi an thah hnuah ralkap pawl cu Ayadaw peng Siohkha (ရှောက်ခါး) khua ah an lut ih inn an urkang tiah tualsung media hnen ihsin theih a si.
“Khawlu ihsin an urkang tho, kannih khal kan tlansuak, inn ziangzat a kang timi fiangten kan thei hrih lo tiah Siohkha khuami pakhat in a sim.
Siohkha khua mipi pawl cu an tlansuak thu, khawsung ih ramkhel cangvaitu pawlih inn an siatsuah hnuah an urkang thu, ralkap pawl cu khua kiangkap ah relh tahratin țanhmun an khuar ruangah khawsung mi pawl cu khua ah zohman an luh ngam lo thu tualsungmi pawlin an sim.
Siohkha khua ih ralkap hnen thuhla simtu Hmaw Gyi cu Ayadaw Ningja hriamkai pawlkom in November 11 ah an kap that ih, cuihnuah ralkap 30 hrawng an ra lut ih khua an urkang thu tualsungmi pawlin an sim.
USDP lemsawm hotu Hmaw Gyi cu ralkap thawn hmunkhat ah hnațuantu a siih, Siohkha khua mi a si.
