Bihar a Muzaffarpur district a mi Nitishwar College a an professor, Lallan Kumar hi Hindi ah assistant professor in a awm a. Mahse Lallan Kumar hian College a thawhna ah hian kum 2 leh thla 9 a rei a hlawh chu a pe kir tih hriat a ni.
Lallan Kumar hian a hlawh cheng nuaih 23.8 lai a tam chu a pe let tih a sawi a, hetia a hlawh a pek let chhan hi College a thawh atangin Class an kal that ngai loh vang leh zirlai zirtir tur an awm lo a ni a ti.
2019 ah Dr Lalan Kumar hian zirtirtu hna thawk turin College hi a zawm tan a. Mahse hna a zawm atang hian in Hindi class ah zirlai 131 zet ah tumah an inlan lo tih a sawi.
“Kan department a rawn enroll te tumah zirtirna ka pek siloh chuan ka thawh loh hlawh lak chu thil dik a ni thei ngang lo” a ti. A hlawh cheng nuaih 24 dawn laia tam hi cheque in a thawn kir leh a ni.
Nitishwar College hi Babasaheb Bhimrao Ambedkar Bihar University (BRABU) hnuai a awm a ni. Dr Kumar hi Jawaharlal Nehru University atangin Hindi ah Master a zo a, Delhi University ah PhD leh MPhil a hmu bawk.
Class mumal an kal lo chu Lallan Kumar hi a ti lunghnur hle a, college dang a transfer turin a dil hial nghe nghe. College principal, Manoj Kumar chuan 0% attendance anga Lallan Kumar an college a chhuah hmingchhia chu dawt a nih thu sawiin hrileng vangin Class mumal kal theih a nih loh zawk thu a sawi a ni.
“Ka chhia leh tha hriatna hmang a ka ngaihtuah pawh in thawhloh hlawh lak chu thil dik a ni thei lo. Online class neih lai pawh in zirlai inlan chu tlem te chauh an ni thin a, ka thawh hah ni miah loh hlawh ka lak chuan ka tan zirna hi engmah lo mai a ni tihna a ni” a ti.
