October 13 zinglam ah CNF/A, CDF țangkop le ralkap karlak doawknak a suak tiah theih a si.
Tuini doawknak thuhla ah CNF/A thusimtu Salai Htet Ni cun “Hakha khawsuah Hniarlawn khua ah zinglam suimilam 10:00 hrawngah doawknak a suak, ralkap 5 an thi, kannih CNF/A, CDF lam hriamhma ngahtu kan um lo, cun peng 6 hlatnak ah ralkap lam cun hriamhreipi le meithal pawl an kap, hmaiton ih tong aw timi cu sim theih a si lo, ralkap pawlin pawngpakah ih an kahmi a si, pehtlaihnak a harsat ruangah pehtlaih awk theih a si hrih lo, doawknak a um timi cu sim a theih” tiah simnak a nei.
Cuihleiah doawknak hmun kiangih um Hniarlawn khua ih kum 13 mi Peng Uk Thang (မောင်ပဲန်အုပ်ထန်) telin mi 4 an kaih hleiah SKAT motor pakhat khal an laksak thu tualsung media cun an tarlang.
Falam peng Rialti khua ih biakinn telin inn 4 khal tuini October 13 zaanlam suimilam 4:30 hrawngah ralkap pawl cun an urkang tiah theih a si.
Cuihleiah Falam khawpi Lungpi veng sungih Ar, Vok, Me pawl an thahsak hleiah inn sungih Fang, Ci, Siti pawl an laksak tiah theih a si.
Ralkap council ih nitlaknak saklam ralkap hmunpi hotu thlengawknak an neih hnu Chin ramkulh sungah ralkap thazang an bet rero ih doawknak nasazet a suak thei tiah theih a si.
Ref : Khonumthung, Zalen
