Chin ramkulh မတူပီ le ပလက်ဝ karlak zinpi ih um Kawl ralkap battalion (304) sakhan cu CNA le CDF – Matupi ṭangkawp cun mizansun January 26 zaanlam ah khan an kap ih Kawl ralkap 8 an thi, mi 10 hnakih tam in hriamhma an ngah tiah CDF – Matupi cun thuthannak an nei. Hi doawknak ah ralkap pawl cun hriamhreipi le meithal pawl nasazet in an kap ve rero ko na’n Chin ralkap lam ihsi cun zohman hriamhma ngahtu an um lo tiah thuthannak ahcun an tarlang.
Kawl Ralkap battalion (304) cu kan dung January 10 khalah CDF – Matupi cun bomb thawn an rak do dah zo ih ralkap 3 an thi, hriamhma ngahtu khal an tam zet tiah thuthannak an rak nei zo. CDF – Matupi cun မတူပီ le မင်းတပ် karlak zinpi ih um ချန်ပြန်း khawhlun kiang khalah ralkap burkhat cu January 24 sun ah khan an kap ih ralkap pakhat a thi, mi 3 hriamhma an ngah tiah an tarlang.
Cun မတူပီ le ပလက်၀ karlak thotho ih um ထယ်ဘွေး ralkap sakhan cu January thla sungah CDF-Matupi cun an kap ih ralkap thi an um tiah theih a si. မတူပီ le ဟာခါး karlak zinpi khalah CDF – Matupi le Kawl ralkap pawl cu January thla thok lam ah doawknak a um ih ralkap pawl cun khualtlawng suksotu pawl cu kai in ralphaw ih an hman hnuah tualsungmi 10 cu rapthlak zetin an that tiah theih a si.
