China In Myanmar Ralkap Council Ralrinnak An Pe

China ram sungah Myanmar lam ihsin cerek a tlak sal a si ahcun kutbawm in kan lo zoh men lo ding tiah China ramleng tlangbawi zung cun Myanmar ralkap council hnenah ralrinnak a pe.

August 4 le 6 ah khan Shan ramkulh saklam Muse district Pansaing ah ralkap le MNDAA karlak kah awknak nasa zet a rak um ih Kawl ralkap pawlih cerek cu China ramsung ah an va tla. August 4 zinglam nazi 10:00 hrawngah Myanmar ram ihsin kahmi pukpi cerek cu China ram Vuanțing khawpi kiangah a va tla ih, August 6 khalah Vuanțing gate hmai ih doawknak ah cerek pakhat cun China ram sungih inn pakhat a ngah tiah China cozah thuneitu lam cun simnak an nei.

Myanmar ram sungih vawi tampi doawknak ruangah meithal cerek le pukpi cerek pawl China ram sungih a tlak hi China le Myanmar ram hnih lungkimnak hminkhen pahbal a siih, ramri ih um tualsung mipi pawl an nunnak le humhimnak tampi a thlaphang ter asi tiin China lam cun an sim.

Hi thuhla thawn pehparin August 5 ah khan China ramleng tlangbawi zung ih ralkap palai hotu pakhat cun China ram ih Myanmar Ambassador U Myo Thant Phe cu ko tahratin doawknak cawlter cih dingin simnak khal an nei.

Cuihleiah lehhnu hrimhrim ah ramri tluan ih doawknak a umsal ding an duhlonak thu, ramri humhimnak cu control tlang ding a si thu le China ram ah Kawl ralkap pawlih hriamhrei cerek a tlak sal asi ahcun kutbawm in kan zoh men nawnlo dingih kan lo lehrul ve ding tiah ralkap council cu China cun theihternak ca a kuat.

China ram sungih cerek tla thawn pehparin Shan ramkulh saklam Kutkai ih ralkap burpi hotubik ဗျူဟာမှူး cun China ram ih cerek tlami pawl cu an ni kahmi a si lo thu a sim ve.

Leave a Reply

Your email address will not be published.