China – ASEAN Summit cu November 22 zinglam ah online system in tuah thok a siih, Myanmar ralkap council hotu sawm loin Myanmar hmun an lawngter tiah theih a si.
China – ASEAN Summit ah China president Xi Jinping cun China – ASEAN Relations kum (30) kimnak thusimnak a nei.
China in Chairman țuanvo a kaihmi China – ASEAN Summit ah Myanmar ralkap council hotu Min Aung Hlaing cu Summit ih tel dingin ASEAN sungtel ram pawl cu China Asia Affairs Special Ambassador Sun Guoxiang cun lem sawmnak an rak tuah rero ko na’n Malaysia, Indonisia, Singapore le Brunei cun an rak cohlang lo.
Cuihnuah China cun ASEAN ih dinpimi cu cohlan a si thu, ASEAN ih hmanmi ramkhel a si lomi palai kai ding timi daan cu China in a thlun ding thu China Ministry Of Foreign department ih Asia Affairs Special Ambassador Sun Guoxiang cun simnak a nei.
China – ASEAN Summit hlan November 15 zaanlam ah Chin Asia Affairs Special Ambassador Sun Guoxiang cu Myanmar rampi thuneihnak latu Min Aung Hlaing thawn Naypyitaw ah thurel tlangnak an rak nei.
Kan dung October 26 ih tuahmi ASEAN Summit khalah ralkap council hotu Min Aung Hlaing cu ASEAN in Summit kai an rak siang loih ramkhel thawn pehtlaih awknak nei lo ralkap council Ministry Of Foreign department ih permanent secretary U Chan Aye cun ASEAN in an rak sawm.
