Chinland Defense Force – Hakha cun hriamhreipi le cerek pawl thawn CDM a luttu ralkap le palik cu tangka ting 200 laksawng kan pe ding tiah September 16 ah thuthannak an nei.
CDF Hakha ih thuthannak ahcun ralkap le palik, department hruaitu upa pawl dinhmun in CDM an lut asile an sungkua hrangah a țulmi kilhimnak, ei – in le harhdamnak lam kilkhawinak kan tuahsak ding tiah an tarlang.
Cuihleiah meithal le cerek pawl thawn CDM an lut asile tangka ting 50, hriamhreipi le cerek pawl thawn CDM an lut asile tangka ting 100, mipi neihmi department ih motor pawl thawn CDM an lut asile tangka ting 50 tiin a tawn rori’n laksawng kan pe ding tiah an tarlang bet.
Cuihleiah thuthannak ahcun Min Aung Hlaing le a kuthnuai ralbawi pawl cun anmai hlawknak hrangah mipi hnen ihsin thilri an la ih an siatsuah timi khal an tarlang cih.
Cuti vekih thil țha lo tuahnak ihsin CDM lut duhtu ralkap le palik, department hruaitu upa pawl cu lungawi ten kan hmuak a si tiah CDF Hakha cun thuthannak an nei.
