Bomb 500 hmangin palik zung pawl, ralkap pawl, ralkap council ih office pawl hmuitin in October 10 ihsin kan do thok ding tiah People Revolution Army (PRA) cun thuthannak an nei.
PRA ih thusimtu Bo Japan cun “kannih cun bomb hi kan rinsan, ralkap pawl khal doawknak tuah dingah tam zetzet in hmai an nawr, curuangah kan tumtahmi bomb ngah thei dingin kan tawlrel lohli a țul, bomb pawl cu palmi pawl, denmi pawl, pahmi pawlkan hmang ding, thiamnak khal a sang vivo, bomb control ding Yimuh bomb kan tuahmi khal kan hlawhtlin, cun Drone thawn do theinak kan tuahmi khal kan hlawhtlin, Drone thawn tuahmi bomb cu palik zung pawl le ralkap council office pawl kan do ding” tiah a sim.
Mipi dinhmun in palik zung pawl, ralkap council office pawl kiangkap ah feh lo dingin le a hleice in Monywa -Pale – Kankaw lamzin ah feh lo dingin PRA cun ralrinnak an pe.
Myanmar ram hmun hrekkhat ah October 8 ahhin ralkap council ih umnak hmun 29 cu PDF le tlangpar ralkap cun an do ih ralkap lam mi 50 kiangkap an thi tiah NUG ih thuthannak vekin theih a si.
Ralkap council lam khal Kachin ramkulh, Chin ramkulh, Kareni ramkulh, Sagaing ramțhen le Mague ramțhen sungih khua pawl ah an luh ih inn an ur, mi an kai, an thah rero ruangah raltlan mipum khal an karh sinsin tiah theih a si.
