An inneih tur thu India ram a thuthar lakhawm tu ten an sawi cham chi hnu ah Sidharth Malhotra leh Kiara Advani te chu Rajasthan’s Suryagarh Palace ah damchhunga nupa ni turin inneihna an hmang.
An pahnih hian kum 1 aia rei an inngaizawng tawh a, film lar tak mai ‘Shershaah’ ah inhmeh takin an changdun bawk. An inneih thlalak hmasa ber hi an Social Media ah an phochhuak ve ve tawh a, lawmpuitu pawh an thahnem hle.
Inneihna hi an hnam dan anga kalpui a ni a Kiara Advani hian lehenga senno ha in, a mo kawr hi Manish Malhotra kutchhuak a ni, Sidharth hian ivory shervani a inbel ve thung.
Sidharth Malhotra leh Kiara Advani hian inneih hunserh an hman hma Thawhtanni ah mehendi leh sangeet te an nei hmasa. Inneihna ah hian sawm bik an chhungkhat, an thawhpui leh thian tha zual te chauh in an telpui.
Kiara leh Sidharth te hian an inneih hma zawng kha chuan an inngaizawng tih hi mipui hma ah an zep tang tang a, an mahni lam atangin an inkawp thu hi nemnghehna engmah a awm ngai lo. Mahse midang ten an chezia leh awmdan atangin an inngaizawng tih an hai chuang lo a, 2021 a an film lar tak tihchhuah ‘Shershaah’ an chandun hnu in an inkawp zui deuh chawt. Hei hi an pahnih a film an chandun hmasak berna a ni nghe nghe.
Kiara hi ‘Govinda Naam Mera’ kha hmuh hnuhnun ber a ni a, Kartik Aaryan nen an chandun tur ‘Satyaprem Ki Katha’ ah a lang leh dawn a ni. He film hi June 29-a tlangzarh tura ruahman a ni a, a lehlamah Sidharth erawh Rohit Shetty series thar tur Indian Police Force hmangin web series-ah a debut thuai dawn. Hei bakah hian a project lo awm tur zinga pakhat atan ‘Yodha’ a nei bawk. A film chan hnuhnung ber chu ‘Mission Majnu’ a ni a, Rashmika Mandanna nen an inkawp a ni.
