South Korean girl group Blackpink te hi kum 2016 ah band ang a an indin atangin Record hrang hrang an siam nual tawh a, khawvel a Girl Band hlawhtling ber ah sawi hial an ni.
Band mai piah lam ah hian member 4 Jisoo, Jennie, Rosé, leh Lisa te hian an mahni mimal solo artists ang pawh in Record chhinchhiah tlak tak tak an siam bawk a ni.
Thawhlehni khan Guinness World Records chuan Blackpink member Lisa in kum 2022 chhungin Record thar pathum a siam tih an puang. GWR-in a tarlan danin, kum 25 mi rapper-dancer hian January 19, 2022 thleng khan Instagram ah 86.9 million followers a nei a, K-pop artist zinga Instagram zuitu nei tam ber a ni.
Hei chauh hi a nilo a, Lisa hi 2022 MTV Video Music Awards leh MTV Europe Music Awards-ah a hla “Lalisa” hmang in hmeichhe soloist zingah “Best K-Pop artist” chawimawina dawng hmasa ber a ni. Hemi hma hian he title hi kum 2019-a category an siam ṭan aṭang in supergroup BTS chauhin an dawng.
Guinness World Records-in heng thu an puanzar hnu hian Blinks (Blackpink fandom tia koh) leh Lilies (Lisa fans tia koh) te chuan phur leh hlim tak in an lo dawng sawng a, an lawmzia leh Lisa chu Kpop Artist a hlawhtling ber a nih thu in an fak nasa hle bawk.
Lisa hian September 10, 2021 a ‘Lalisa’ a Release khan ni khat chhungin views maktaduai 73.6 a nei a, Solo artist zingah darkar 24 chhunga Youtube music video thlirtu nei hnem ber a ni.
