A vei 52-nak ASEAN Foreign Ministers Annual meeting ihsin Brunei Foreign Minister Erywan Yusof cu ASEAN Myanmar palai ih an hrilnak parah NUG cun lungawi sopar te’i an hmuah thu, Brunei ram cu ASEAN ram sung hoha ih hnațuan dingah a thupizia thu NUG ih ramleng tlangbawi Daw Zin Mar Aung in August 5 ah cakuatnak a nei.
NUG dinhmun in milai zawnruahnak lam sersuak theinak thuhla thawn pehparin ASEAN ih thupommi pawl hlawhtling zetih țuan suah theinak hrangah kutkai ih țuantlang ding le ramkhel buainak ah kan zaten țuantlang in tawlrel dingah kan man ringring tiah cakuat ahcun a tarlang cih.
Cakuat ahcun NUG dinhmun in thil 3 dilmi neih a siih, ASEAN le a pehtlaih meeting ah ralkap council ihsin Myanmar aiawh ih an telmi hi thlaphan a si thu, ralkap council cun ASEAN thupom verse (1) le (2) ih tarlangmi a pahbal hrim ih ram sung mipi a dekcok thu, ASEAN Myanmar palai dinhmun in ralkap council thawn ram buai thuhla relkhawm tikah a hlan khan ihsin bikhiah nei cia dingah le ralkap council hnuai ih kham theih loin a darh tukmi Covid – 19 kham thei dingin NUG le ASEAN țuantlang a țul thu pawl ngennak a nei.
