October 26 ihsin tuah dingmi ASEAN meeting ah Myanmar palai ah sungțuan level upa kai dingih sawmnak cu a niam tuk ruangah kan cohlang thei lo tiah ralkap council ih ramleng tlangbawi zung cun October 25 ah thuthannak an nei.
ASEAN meeting ah rampi upa asilole acozah upa asilole rampi upa aiawh theitu tlangbawi level tel ding a si lawngah Myanmar ram in kan cohlang tiah tufang ASEAN chairman Brunei ram cu thuhla an khirhsal thu khal an sim.
ASEAN meeting tuahmi zaten ah ASEAN sungtel ram pawl ihsin rualran ten meeting kai dingah ASEAN daan ah tarlang a siih ASEAN sungtel pakhat a simi Myanmar ram khal midang ASEAN ram pawl vekin rualran ih palai kai dingah cavo famkim a nei timi khal ralkap council ih ramleng tlangbawi zung thuthannak ahcun an tarlang.
A țum (38) le (39) nak ASEAN meeting cu October 26 – 28 tiang tuah ding a si. Hi meeting ah Myanmar ram ih ralkap council hotu kai sian a si loih ramkhel thawn hnawihnih awknak nei lo lawng kan sawm ding tiah October 15 ah ASEAN ramleng tlangbawi meeting ahcun thutluknak an nei.
Hi thutluknak vekin Myanmar ram ihsin ramkhel dinhmun ih palai a si lomi ramleng tlangbawi zung ih permanent secretary, director general U Chan Aye cu ASEAN meeting kai dingah tufang ASEAN chairman Brunei ramleng tlangbawi zung cun an sim.
Hivek ih sawmnak cu ASEAN daan thawn a kalh aw ih ASEAN ih hnațuan dan le feh dan khalah a mawi lo hleiah meeting kaitu ding Myanmar palai ih level cu a niam tuk ruangah meeting thurel dingih khamnak cu ASEAN daan 5-nak thawn khal a kalh aw tiah an sim.
Hi thuhla thawn pehparin ralkap council Information Deputy Minister General Zaw Min Htun cun ASEAN in ramleng tlangbawi zung ih director general an sawm thu Media hrekkhat ah simnak a nei. Asina’n Myanmar dinhmun in meeting kai ding le kai lo ding cu a fiang hrih loih ASEAN cu thuhla khal kan theiter hrih lo tiah ralkap council ih information deputy minister cun a sim.
