Argentina chu kum tam tak hnu ah ram hrang hrang Football hmang a in elna neih zawh taka a thiam ber trophy an hum haw hnu in Argentina team te chu an ram sawkar leh mipui in nasa takin an chawimawi.
Kum 36 zet a liam hnu a World Cup trophy an chawi leh thei hi an lawm em avangin Central Bank of the Republic of Argentina chuan an ram team khaiding tu pa Lionel Messi hming daih tawh loh nan leh chawimawi nan a thlalak chu an ram pawisa note ah chuantir an tum nia tarlan a ni.
Financial newspaper El Financiero in a tarlan dan chuan Messi thlalak hi thousand-peso currency note a chuang tura ngaihtuah mek a ni a, an kaltlangpui ngei pawh a rinawm thu an sawi bawk.
Argentine Central Bank a member te chuan he ngaihdan hi an pu chhuak a, hei hi thuneitu sang zawk te chuan thil tha tak ah ngaiin ngaihtuahzui tlakah an ruat thu report chuan a tarlang. Hemi chungchang hi a darhzau hnu ah Social Media lamah sawi a tam nghal viau bawk a ni.
Ruahmanna ah chuan pawisa note side khat ah hian Messi thlalak hi nemkai a ni ang a, a lehlam ah hian an group nickname ‘La Scaloneta’ chuantir a ni dawn an ti.
Argentina hian an ram aiawh a pasaltha chhuak te chawimawina hi an lo nei tawh thin a, 1978 kum a World Cup nomawi an chawi hmasak ber tum pawh in commemorative coins an lo tichhuak hial tawh a ni.
