November 9 zinglam suimilam 11:30 hrawngah ARSA mipum 30 hrawng le ralkap pawl cu Rakhine ramkulh saklam Maungtaw peng Khamawngsik khua nisuahnak thlanglam meter 2000 hrawngah doawknak a um tiah Information deputy minister general Zaw Min Htun in simnak a nei.
“Doawknak cu minute 10 hrawng a rei, kannih lam khal ralkap hrekkhat hriamhma an ngah, hrekkhat media le online ih thuthang darhmi vekin AA thawn doawknak a si lo, ARSA ralhrang thawn doawknak a si, Maungtaw peng lam ah AA pawl cangvaihnak a um lo” tiah general Zaw Min Htun in a sim.
Doawknak hmun kiangkap ah Myo (မြို) miphun pawl umnak Ale khua le Ahtet khua an um na’n 2017 ihsin minung an um nawn loih, atu doawknak thuhla thawn pehparin thuhla cipciar theih a si hrih lo tiah Yinohngathar khawbawi U Ngui Thar Htun in a sim.
Atu nehhnu lam hi Butițawng, Maungtaw saklam ah ARSA pawl an cangvaih rero thu, ARSA thawn doawk lonak thla 6 hrawng a kim zo thu, cui karlak ah rittheihsi pawl kaihmi an um thu pawl khal a sim.
ARSA cun 2017 January 4 ah Maungtaw peng sungih ramri kiltu palik zung 4 cu caan bangaw in țumkhat ah an rak do dah zo.
Maungtaw peng May Yuh tlangtluan ah ARSA, RSO le ARA pawl cu Myanmar – Bangladesh ramri ah hmunkhur in an cangvaih thu khal theih a si.
