China ram a nupa inhmangaih tak te chanchin darh chuan mitam tak thinlung a hneh hle. He thawnthu hi mipa pakhatin a kawppui chu thla khat zen zawn an inngaizawng tih ah a zeng a ni tih a hriat hnu pawh in a kalsan lo a, duat taka a enkawl chanchin a ni. He mipa hian a bialnu hi kum 30 dawn lai alo enkawl tawh.
Kum 1992 khan Central China’s Hunan Province-ah kum 29 mi Xu Zhili chuan kum 21 mi, hnathawk, Huang Cuiyun nen an intawng a, an pahnih hian an intawn dan chu vawikhat inhmuh a induh nghalna ‘love at first sight’ hmangaihna a nih thu an sawi. Thla khat vel an inngaihzawn hnuah an pahnih hian an inneih hun tur chu an nghak thei tawh lo a, an nu leh pa te hnen atangin phalna dil an tum ta a ni.
Huang chuan Xu hnen ah a chhungte hmu turin a duh a, Huang chhungte hmu tur hian bus-in an kal ta a ni. Mahse Huang nu leh pa hmu tura an kal lai chuan an chuanna bus chu accident a tawk a. Xu hian hliam tenau tlemte chauh a tuar laiin Huang erawh a hliam na hle thung. A zangruh (spine) chu a chhia a, hei hian a ke chu che thei lovin a tih zeng (paralyse) phah a ni. Accident a thlen hnu hian Xu chhungte chuan Huang hi kalsan se an duh a, pawh then hial an tum. Mahse Xu hian a duh hauh lo a, hmalam hun thlir a nun hlim tak hmang dun tura a thutiam chu hlen chhuah a duh a ni.
Xu hian Chinese social media-a video viral ah chuan “Kan inngaihzawn hunah dam chhung atan ka enkawl dawn tih ka hrilh a, ka thutiam pawh ka hlen ang,” tiin a sawi. Vanduaina thlen hnu hian Xu chuan Huang hi a enkawl turin a chenna in lamah a hruai haw a ni.
Huang hi enkawl reng a mamawh avangin Xu hian khua a chhuahsan hlei thei thin lo va, eizawnna tha zawk neih theihna hun remchang tam tak a hloh phah hial. Huan te siam a thlai te ching in hun a hmang thin. China thingtlang lama hman lar a nih loh lai pawhin a hmangaih tihlim nan Chinese instrument erhu chu tum a zir a, Xu hian Huang tan hian inthiar awlsamna tur a siam sak vek nghe nghe.
Huang hian fa a neih theih loh vangin an nupa hian fanu an adopt a. Heng zawng zawng karah hian Huang chhungte chuan accident a tawk tih pawh an hre lo, thil thleng chungchang engmah an hrilh loh avangin. Kum 26 hnuah Huang hi a chhungte nen an inzawmkhawm leh ta a.A pa chuan tualchhung journalist-te nen thawkdunin a fanu chu an zawng a, a tawpah chuan an hmu thei ta a ni. An inzawmkhawm leh tak hnu chuan Huang hian a nu leh pa malsawmnain Xu chu pasal ah a nei bawk.
