Kardashian chhungkaw Reality Show thar tihchhuah tur Hulu Series ‘The Kardashian’ chuan ngaihven a hlawh chho hle a, hetah hian Kardashian chhungkaw member te thil tawn hrang hrang pawh tarlan tur a beisei ani.
Khloé Kardashian chuan an chhungkaw Show ah hian a bialpa hlui Tristan Thompson nen a an inkar tawp dan leh paternity scandal vanga mualpho na an tawh chungchang chu zeh tel ngei a tum thu a sawi.
Variety hnen ah Khloè chuan Tristan Thompson nen a an inkara thil thleng lian tak chu nuihzatthlak a nih loh thu leh sawichhuah khawp a thil mawi a ni lem lo a, mahsela a hringnun a thil thleng pakhat a nih miau si vangin Show ah hian tihlan a tum thu a hrilh ani.
Nikum December 2021 ah trainer hmeichhe pakhat Maralee Nichols chuan Tristan hi a naute pa ah a puh a, an pahnih a mipat hmeichhiatna an hman dun ngei thu a puangchhuak. Thompson hian a tirah naute hi a fa a nih loh thu sawiin a pha nasa hle.
DNA test hmanga finfiah a nih hnu ah phat rual lovin naute chu a fa ngei a ni tih hriatchhuah a ni a, Khloé Kardashian hnen ah ngaihdam dilna ziak in a thiltih ah hian mawhphurhna lak a tum tih a sawi bawk.
Tluang taka an inkawp mek laia hnung lama Tristan khawsak dan hriatchhuah a nih chuan Khloé Kardashian ngei pawh a rilru a na hle. Tun hi a vawikhat thlenna chauh a ni tawh lo bawk a, 2018 pawh khan Khloè in tuna an fanu True a pai lai mekin Kylie Jenner thiannu thin Jordyn Woods nen an inkarah thil thleng alo awm tawh a. Hei vang hian Kylie in Jordyn Woods pawh a thian atang in a ban zui phah hial ani.
Kardashian chhungkua hi Entertainment khawvel ah boruak an nei lian a, an hringnun a an thil tawn hmang a Reality Show an chhuah atang in sum an siam char char thei zel. Hulu series thar hi April 14 ah chhuah tan tur a ni a, Khloe bakah hian Kim K leh a pasal hlui Kanye West bakah a bialpa thar Pete Davidson te chungchang pawh mite hriatchian chak ani mek.
