US lama intih hmingchhiat tumna chungchang a an inkhinna ah hnehna a chan loh vangin Actress, Amber Heard chuan a pasal hlui “Pirates of the Caribbean” star, Johnny Depp hnen ah pawisa tam tham tak chawi tura tih ani.
Mahsela Court in an thubuai a remna a sum chawi tura a tih zat hi Amber Heard hausakna nen a in thlau nasa hle a, Amber hausakna hi $8 Million bawr vel chauh a ni. Ningani khan Amber tana ding a lawyer Elaine Bredehoft chuan NBC’s TODAY show ah Amber Heard hian Johnny Depp hnen a sum a chawi tur zat pawisa hi a neih loh thu a sawi.
Elaine Bredehoft hian Amber Heard hi Court thutlukna siam ah leh sum chawi tura a tih ah hian a lung ala dam thei lo a, khin that leh a tum viau tih a sawilang bawk.
Nilaini khan an inkar thubuai hi Jury 7 ten ngun taka an ngaihtuah hnu ah lungrual tak in thutlukna an siam a,Depp leh Amber te hi an in ti mualpho tawn ve ve a mahse Amber hi sum chawi hnem zawk ah a tang ani.
Jury te chuan Depp hnen ah Amber hian $15 Million chawi turin a hriattir a, mahse a sum chawi tur zinga hremna bikah hian sum chawi theih tur chin bituk a awm vangin Amber hi a vanneih phah hlauh zawk. $15 million a chawi tur atang in $10.35 million ah a tla hniam a, Depp pawh in Amber hnen ah $2 million a pe ve thung ang.
2020 a The Sun tabloid in nupui kutthlak ching tia an sawi ah Depp hi libel case ah hnehna alo chang tawh lo a, tuna an inkhin chhan tak hi December 2018 a Amber in The Washington Post a op-ed a ziah vang kha niin hetah hian kutthlak nasa tak a tawh hnu a dam khawchhuak angin a insawi.
Johnny Depp hming sawilang fak lo mahse mi mawl ber tan pawhin Depp chungchang a sawina a ni tih a hriatloh theih loh a, Depp hian intih hmingchhiatna hmangin $50 million chawi turin khinna a thehlut ta ani. Amber Heard pawh in a hnu lawk ah $100 million in khin letna a thehlut ve nghal.
Amber lawyer Bredehoft chuan Depp legal team te Court chhung ah chimawm taka an khawsak thu a sawi bawk a, an finfiahna neih ang te pawh phawrh leh tarlanna hun siam sak an nilo a ti bawk.
