Taylor Swift chuan a album thar ber ‘Midnights’ tlangzarh turin a inbuatsaih mek a,album release hma in a bialpa Joe Alwyn nen vantlang hmuh thei in an inzuichhuak lai hmuh fuh an ni ve mial.
Thawhtanni khan Taylor Swift leh a bialpa British lemchan thiam Joe Alwyn hi New York kawtthler ah an chhuak dun a, furniture vel leiin an bazar dun a ni. Nghet taka inkawp chung in mipui hmuh ah ual au taka an pahnih a an chhuak lai hmuh tur hi an vang hle.
Kum 32 a upa Taylor Swift hian a album thar ‘Midnights’ a hla awm tur zinga mi ‘Lavender Haze’ chu kum 6 liam ta a a kawppui mipa chungchang a nih tur thu a sawi a, a bialpa Joe Alwyn-a a hmangaihzia a puanchhuahna hla tur a ni tih pawh a chiang tawh.
Taylor Swift leh Joe Alwyn te hi 2016 chawhnu lam atangin an inkawp tan a. Taylor aiin Joe Alwyn hi kum 1 in a naupang zawk bawk. An mimal leh eizawnna kawng ah an inthlawp dun in, Taylor hian a hla thenkhat ah Joe hi ‘London boy’ tiin a sawichhanna hla thu a phum ru fo. Tin, Taylor Swift hla thenkhat phuah tu zingah hian Joe Alwyn hi a tel ve bawk a ni.
Ngaihzawng lam ah Taylor Swift hi a tluang vak lo a, mipa hrang hrang Harry Styles, actor Jake Gyllenhaal, DJ Calvin Harris, singer Joe Jonas leh rock heartthrob John Mayer te a kawp tawh a, a hla tihchhuah zingah a bialpa hlui te chungchang tam tak a zep nual. Taylor hla te reng reng hian a phen ah thil eng emaw thup leh ken tel a nei thei zel hi zaithiam satliah a nih loh zia tichiang em em tu a ni.
