Taliban suak sual ten hneh chhuh a an thuhnuai a an ram an awpbeh sak hnu ah Afghanistan chuan hun khirh tak tawng in Economic lam ah harsatna an tawk a, hnathawh tur mumal neilo eng emaw zat an kat nuk mai.
Media Industry a kum tel lo thawk tawh Afghan journalist ni thin Musa Mohammadi thlalak chu Internet ah a viral nasa hle. Taliban ten an ram a thuneihna an chelh hnu ah Musa Mohammadi hian hnathawh tur mumal nei lovin khawlai ah ei tur a zuar ani tih an sawi.
Thlalak hi Kabul University lecturer leh former journalist Kabir Haqmal chuan post in Taliban hnuai a Afghan Journalist te nun hman dan chu Twitter ah khawvel hmuh theih tur in a pholang.
Kabir Haqmal hian a sawidan in Musa Mohammadi hi TV channel hrang hrang ah anchor leh reporter in a thawk thin a, mahse tunah chuan Taliban hnuai ah a chhugte chawmna turin pawisa luhna tur dang a nei tawh lo a, khawlai ah ei tur a zawrh a ngaih phah ani ati. Republic a tluk chhiat hnu ah Afghan mipui te hian tunhma a la tehkhin rual loh retheihna an hmachhawn mek tih a sawi.
Taliban in an awp hma chuan Coat suit nen smart theih ang ber in TV ah mipui hmuh turin a inlan thin a, mahse a thawhna news channel ten pawisa pek tur an neih tawh loh vangin ban zingah a tel. 2011 atangin Media Industry ah a lut tan a. A hna a chan hnu hian khawlai ah ei tur zuar in a chhungte chawm nan nitin a inhlawh thu The Quint te a hrilh.
“Ka hna atanga ban ka nih hnu ah thla 6 leh thla 7 chhung zet chu in ah ka awm. Nupui nei thar hlim chauh ka ni a, ka nu a dam lo zui bawk. Inneihna senso ah leiba ka nei a, chu chuan ka chhung te enkawl nan eng hna pawh thawk lo theilo in min siam a, pawisa ka thawkchhuah a ngai ani” tiin a sawi.
Media sectors, NGO leh private sectors ah te hna han dil ve mahse engmah chhanletna duhawm a hmu ngailo. Khawlaia a inzuar lai thlalak a darh hnu ah National Radio and Television a Director-General, Ahmadullah Wasiq chuan alo hmu a, a khawngaih hle bawk. Musa Mohammadi hi an department ah hna pek a duh thu a sawi hial ani.
