Puerto Rican Superstar, Ricky Martin (kum 50) chu a chhungkaw mi leh sa zinga mi ngei atang in a unau fapa chuan mipat hmeichhiatna hman sual ah leh zarbuai thin tu ang in mualpho takin a puh a, he thubuai hi Court hial thlenpui a ni bawk.
July 21 khan an thubuai hi ngaihtuah a ni a, Ricky Martin hi Zoom kaltlangin Court ah a inlan. Mahse a unau fapa hian Ricky laka thubuai a thlen leh a puhna ah hian a thu zuk leh in a inhnukkir a,Ricky Martin hian hnehna a chang a ni.
Roreltu Judge chuan Ricky Martin laka ‘restraining order’ a chhuah pawh hemi ni la la hian a sut leh a, Judge in thiam a chantirna ah hian Ricky Martin team te pawh an lawm in Court in dik tak a ro a rel thu an sawi ve bawk.
Ricky Martin ngei pawh he thubuai ah hian rawn tawngchhuak in dawt hmanga a hming tihhliau a ni chu a lak nat thu leh pawm thiam harsa a tih thu a sawi hial a, a chung a thleng ang hi midang tu chung ah mah thleng ve tawh lo tura a duhthu a sawi bawk.
Kum 21 a upa a unau fa hian Ricky Martin nen hian thla 7 chhung inzawmna tha lo an nei tih khawvel hma ah a puang a, an inthlahfel hnu pawh in a tihbuai zui zel thu a sawi tel. Martin team lam phei chu an thinrim hle a, rilru lamah harsatna a nei an ti hial a ni.
