Russia in Ukraine a do mek ah thil hrang hrang hmuh tur a awm a, Russia in dimna tel lo a Ukraine a beih vang hian selna thu pawh a tam hle. Hetih lai hian Russia President, Vladimir Putin chhungte chuan ngaihven an hlawh.
Indona chhuah hnu lawk ah Russia hruaitu pa Vladimir Putin fanu nia chhal kum 18 a upa Luiza Rozova chuan a Social Media ah tawngkam dengkhawng tak tak a dawng nasa hle. Sawichhiatna tam tak a dawn hnu ah a chanchin hriat zui tur awm lovin Social Media atang in a inthiarfihlim tih hriat ani.
Luiza Rozova hi a pa chet dan vang hian troll nasa tak a dawng a. Mi dawizep tak a nih thu te, bunker ah a biru em ni tih te leh a pa in buaina a siam zawng zawng hi chinfel dang kawng dap tur a tiin tualthattu fanu a nih thu ten chirh theh rawn a ni. Hemi hnu lawk hian a Instagram hi a delete thu an sawi. Hetih mek lai hian indona thleng chu a thiam loh pakhat mah a awm loh thu leh dem vak kher a ngai lo tia a thlavang hauh sak an awm bawk.
Luiza Rozova hi St Petersburg ah lehkha a zir a, a nu hi Svetlana Krivonogikh, 45 a ni. Svetlana Krivonogikh hi Putin nen hian an inkawp thin nia hriat a ni a, Luiza Rozova hi a ruka Putin fanu a nih thu independent media outlet ten an puang ani.
Svetlana hi a hma chuan cleaner hna a thawk thin a. Mahse Moscow lam Media reports ah chuan tun ah multi-millionaire ni tawhin sum tam tak a neih thu an tarlang. Putin term hmasa 1990s chho atang in sawi rik ret ret an kai daih tawh. Svetlana hian Monaco ah £3.1 million lai property a nei an ti bawk.
Luiza hi Elizaveta tia koh a ni bawk a, a hming lai hi Vladimirovna tia phuah niin hei hi a pa Vladimir hming chawi ni ngei in an ngai. Vladimir Putin hian a mimal nun ah midang inrawlh a duh lo a, hei vang hian a mimal nun thil hi chiang taka hriat a harsat bakah fa a neih zat dik tak pawh hi nemngheh a harsa hle ani.
Putin hian a nupui hmasa former Kremlin first lady, Lyudmila lakah fanu pahnih Maria Vorontsova, 36 leh Katerina Tikhonova, 35 te a nei bawk. Hei bakah Olympic Gold-medal winning rhythmic gymnast, Alina Kabaeva, 38 lakah fa 4 lai a nei niin an sawi bawk a, heng puhna hi a dik chuan Putin hian fa 7 lai nei dawn tihna ani. A chhungte thenkhat hi Switzerland a hmun him ah bihruk tirin, report dang erawh in Siberia a five-star hi-tech nuclear bunker ah an awm mek thu an tarlang thung.
