‘I hrisel leh bawrhsawm pawh in, thihna in min then hma loh chuan hmangaih takin ka vawng tlat ang che’ tih hi an nupa atang hian a chiang hle. An inhmangaihna hi ruahsur tlenfai mai mai theih loh a fir a ni a, thihna chauh lo chuan inthen tir an tum lo.
Chinese nu pakhat Nie hi a pasal tana a rinawmna leh a inpumpekna vangin mite thinlung a hneh a, a pasal hi thla 3 chhung nikhawhrelo a mu tawh in a inenkawlna medical bill ngaihtuah in khawlai ah thil zuar in pawisa a ngaihtuah thin.
A pasal Ding hian September thla ah vanduaithlak takin car accident a tawk a, a lu ruh ah khi awm in heta tang hian biak theih lovin nikhua a hre zui tawh lo. A pasal enkawlna turin sum leh pai ah harsatna hrang hrang in a tlakbuak a, an chenna apartment te pawh hralh hial in mahse chu chuan an mamawh khawp a phuhruk vek thei lo.
Sum lam an mamawhna san zia hria in Nie chuan ei tur amah ngeiin a siam dumpling chu zuar in chhungkua leh a pasal medical bill tur ngaihtuah in sum hmuh theih dan a dap kual ve hram hram a ni.
“Eng harsatna pawh lo tawk mah ila ka hmangaih hi ka venhim ngei a ngai a ni, kum 1, kum 2 emaw kum 3 chhung leh a aia rei pawh nise dawhthei takin ka lo nghak tlat ang” tiin a sawi. An nupa hian 2016 ah an innei a, fa pahnih an nei mek. Chhungkua eizawn nan noodles leh dumplings te zuarin hun an hmang thin bawk.
Nie hian a pasal nena an chanchin lungchhiatthlak leh dinhmun khirh tak an tawn mek hi Douyin (Chinese version of TikTok) ah a tarlang a, reilo te chhung in 2,70,000 aia tam thlir tu a nei a, a pasal tana a inpekna hian fak leh ngaihsan a hlawh viau.
