India ram ah hian a bikin hmeichhia te laka tharum thawhna hi a thleng nasa thin hle. A then chu pasal an neih hnu ah an pasal leh an va lawina chhungten ti duhdahin kut an tuar thin.
Hmeichhe tam tak chuan hlauhna avang te in an chunga thil thleng dik tak leh an tawrhna te chu an zep ru tlat bawk a, nunna hial chan phah an awm laiin heng harsatna leh buaina hneh tu hmeichhe huaisen an awm bawk.
Kerala Kozhikode a Perambra a mi Noujisha hi hmeichhe huaisen tak a ni a, suangtuahna tam tak nen pasal a nei a mahsela a hringnun chu a beisei loh tak maia inthlak danglam in a pasal ngei chuan kut a thlak fo thin ani.
2013 ah a pasal nen hian an innei a, computer application ah postgraduate niin pasal a neih hma in private college ah guest lecturer in a thawk. Pasal a neih hnu hian a hna te chu chhunzawm zel a duh a, mahse an inneih hnu ah a pasal hian a thutiam chu bawhchhia in a duh ang a tih chu a phalsak lo.
A pasal lak atang hian natna bak engmah a dawng lo tih theih tlukin a nun chu a hrehawm hle a, taksa mai bakah rilru lam thlengin a pasal hian hliam a thlen sak. Hun rei tak chhung a pasal tihduhdahna a tuar tih a sawi a, a beidawn tawp ah phei chuan mahni intihhlum duhna hial a neih phah tih a sawi nghe nghe.
Zalenna theih dan kawng nia a hriat chu zawh tum in tuichhunchhuah ah zuanthlak a intihhlum a rilruk hman a. Mahsela a pasal vanga a nunna lak chu dawihzepthlak tia a inngaihtuah fim hnu ah he hrehawmna a ta damkhawchhuah dan chu a ngaihtuah ta zawk.
2016 ah Noujisha hi a fapa kum 1 hruaiin a pasal chenna in an chhuahsan a, a chhungte kiangah let lehin a nu leh pa bakah a unaunu te chuan a thutlukna siam ah theihtawp in an thlawp. In a chhuahsan hnu hian a pasal then na tur a thehlut a, nun bul thar zawh turin hmalam a pan ani.
Pasal a neih hma a hna a chelh lecturer chu a thawk leh a, hemi pah hian competitive exams turin a inbuatsaih. An inthenna hian a zirna lamah nasa takin nghawng phah a, mahse a beidawng chuang lo.
Police lam ah lut turin a bei ta a, Thrissur district a Police Special Recruitment rank ah pakhatna niin Ernakulam district ah 8th rank ani bawk. Theihtawp chhuaha a beih tang tang na rah chu a tawp ah sengin April 15, 2021 khan civil police officer a zawm ve ta ani. Tarlan danin India rama hmeichhia 30% lai hian inchhungkhur ah tihduhdahna leh tharum thawhna an tuar thin.
