Thinrimna in min chen chilh tawh chuan duh loh thleng thleng pawh tih mai a awl phah fo thin. Brazilian pa pakhat chuan a nupui laka phuba lak nan tiin a fate chungah a tuan a, a fate 4 chu lainatna tel hauh lovin an nunna a laksak.
David da Silva Lemos hian a fate hi lukham hmanga nawr betin chemte in a vit a, an ruang hi Thawhlehni khan an chenna Alvorada, southern Brazil ah hmuh an ni.
Nunna chan naupang te hi kum 3, kum 6, kum 8 leh kum 11 a upa te an ni a, David da Silva Lemos hi tualthah thubuai awrhtir in Police ten an man nghal bawk.
Tarlan dan in a fate nu nen hian an inthen a, a laka phuba lak nan a thisen zawm ngei a fate lakah hian a tuan a ni. An nupa hian kum 12 chhung an awmdun hnu ah an inthen a, Lemon hian kut a thlak vangin an inkarah buaina a thlen phah tih an sawi.
A kawppui hmeichhia nu Idenise Martins da Silva hian a fanu chunga thil thleng hi Police te hnen ah a hriattir a, a fanu hnaih a awm lo turin an dil bawk. A chhungte chuan inthahna thlen lai hian naupang te hi a pa bulah an cheng a, Police te sawidan in Lemos hian a fate a thah hma hian a kawppui then tawh hnen ah vauna message a thawn tih hriat a ni.
A fate 4 nunna laksak tu David da Silva Lemos chungah hian Police ten engtin nge hremna an pek dawn tih hi hriat ala nilo thung.
