March 15 khan Mumbai Police chuan Lalbaug area a Ibrahim Kasam building a cheng kum 23 a upa hmeichhia Rimple Prakash Jain chu an man a, Rimple hian a nu kum 55 mi chu that in a ruang a chandarh hnu ah hun eng emaw chen a chen pui a, thla 2 aia rei alo awmpui tawh.
Police ten mitthi an finfiah hi a hming Veena Prakash Jain a ni. A pasal leh Rimple te nen Virar ah an cheng thin a, a pasal hian kum 16 liam ta ah a boral san hnu in Ibrahim Kasar Chawl, Lalbaug ah an inbengbel.
Police ten an sawidan chuan Thawhlehni liam ta khan Veena te chenna ah hian an khawsak relna tur pawisa tlem a zawng pe turin a unau fanu ava kal a, mahse Rimple hian kawng a hawn duh lo. An thenawm te hnen ah an chanchin vel a zawh chian chuan Veena chu thla hnih lai an hmuh tawh loh thu an lo hrilh a ni.
An thenawm te berin rei tak a awmna chin an hriat loh thu leh an hmuh loh thu an sawi hnu ah a ngaihtha lo chuan a chhungte a hrilh a, Lalbaug a an chenna ah an va kal leh hnu in Rimple chuan a nu chu Kanpur ah a awm tih alo hrilh. A chhungte chuan an ringhlel tulh tulh a, Kalachowkie police station ah hruaiin Veena unaupa chuan a unaunu bo thu in complaint a thehlut.
Police team ten Lalbaug a an chenna an va enfiah chuan Veena ruang chu an va hmuchhuak. A fanu Rimple chuan a kut leh a ke te chu a tan sak a, water tank ah a dah. A lu leh a taksa dang te chu plastic bag in a tuam a, cupboard chhungah alo thukru a ni.
Ruang an hmuhchhuah te hi KEM hospital ah postmortem turin an thawn a, Rimple chu zawhna zawtfiah tura hruai nghal in Police te hnen ah chuan a nu chu December 27, 2022 khan chesuala a tluk thu a sawi. Mahse hei hi thih phah na tur leh a ruang chan darh turin an inkarah buaina eng emaw a awm ngei niin a lang.
Rimple hian a nu ruang rimchhe tur thup nan hian perfume leh room freshener te a hmang thin. He thihna rapthlak takah hian Rimple chu Mazagaon metropolitan magistrate’s court ah inlan tura tih a ni a, a chungthu ngaihtuah a ni dawn.
