Thla hmasa mai khan Manipur a Tamenglong ah hmeichhe naupang kum 10 a upa chu a nau awm chunga School a kal lai thlalak Internet ah a lar chiam mai a, Minister te thleng thleng pawh in he thlalak hi lo hmu in mite thinlung a hneh hle bawk.
He hmeichhe naupang hi Class 4 zirlai chauh ala ni a, a hming Meiningsinliu Pamei tia koh ani. An chhungkaw dinhmun in a zir loh em vang leh a nu leh pa ten hnathawh an ngaih vangin a nau enkawl chu a kut ah a tla ani.
School kal a duh em vang chuan harsa tak pawh nise a nau hruai chung hian zirna chu a zawm hram hram a. Zirna lama rual a awh zia leh a thahnem ngaihna chu a thlalak lo hmu tu a piang te chuan an hriatpui.
Manipur a an Cabinet minister Thongam Biswajit Singh chuan Twitter ah Pamei chu a graduate thleng a zirna tumsak a tum thu alo tiam tawh a. A thutiam ang ngeiin a tih hlawhtlin sak ta reng bawk.
Mr Singh hian hmeichhe naupang hi a awmna atang a Imphal ah hruai niin boarding school a zirna a zawmna tur Scopeland Public School ah admission pek a nih thu a puang a, a kal zelna turah duhsakna a hlan nghal bawk.
Pamei chhungte hi Tamenglong district, northern Manipur ah an cheng a, boarding school a admission a hmuh hma hian Dailong primary school ah zirna a zawm ani.
