Inrinni zana Norwich nen an inkhelh tum ah 3-2 in hnehna an chang a, United pui pa ber kum 37 a upa Cristiano Ronaldo chuan hattrick a siam zui ani.
Ronaldo hian a football zinkawng ah ram leh club tan hattrick vawi 60 zet a siam tling tawh a, a ni aia hattrick siam hnem dang hi active player zingah an awm lo. Norwich an hneh tuma hattrick a siam avang khan Ronaldo hian bonus tha tak a dawn phah bawk.
Ronaldo hi tuna a club United nen contract an ziah dun ah tun season a goal 20 a khung tling a nih chuan £750,000 dawng turin inremna an lo nei diam tawh ani. Ronaldo hian hat-trick a siam hmangin United tan hian goal 21 a khung tling a, a pawisa dawn tur bakah hian hattrick a siamna nen £100,000 belhin £850,000 zawk a dawng dawn tih The Sun chanchinbu chuan a tarlang.
Contract an ziah ang a goal 20 a khung tlin tawh vang hian Ronaldo hi tun season la awm a Goal a khung a piangin £100,000 zel a dawng tawh dawn bawk.
Heng te bakah hian Ronaldo hi sum hlawh theihna tur dang kawng hrang hrang ala nei a, a hmakhua a eng bik hle. A awmna club Manchester United chuan tun season a club tan Goal thun hnem ber hnen ah £1million an pe dawn a. Ronaldo hi club in sum a chhawpchhuah dawng thei turin a chance a tha hle.
Tin, tun Season a 30 goal a khung tling a nih chuan £2.75million dawng thei ala ni bawk. Nikum lama United a pan tirh khan Ronaldo hian sawiselna neuh neuh a tawk a, mahse hei a theihna chu a rawn parchhuah tir chho zel alawm.
