Nuneaton, Warwickshire a cheng unau mipa pahnih Kristian Ashmore leh Gabriel te thlalak chu Internet a phochhuah a nih hnu ah sawi a hlawh hle a, a chhan pawh thlalak ah hian lang tel ve lo tur hlimthla tu emaw a lan tel ve vang a ni.
Kristian Ashmore hi tyres chhungah awm in a u chiah Gabriel chuan a selfie pui a, mahse a hnu a thlalak an en let ah chuan mak tak maiin tyre tunnel chhungah hian Kristian hi amah chauh in a awm lo tih an hrechhuak.
Thlalak an enchian hnu chuan mak an ti tulh tulh a, Kristian hnung ah hian hmeichhe naupang tih hairual loh hmel chu a lang tel ve. He thlalak chungchang ah hian Gabriel leh Kristian te unau hian Photoshop engmah a tel loh thu an sawi a, Kristian phei hi chu a hnung a hmeichhe naupang hlimthla lo lang hi a hlau in a rap hle a, a room ah pawh awm ngam lovin a nu kiangah a riah phah hial.
An nu Ayesha Wilson-Bent hnen ah thlalak hi an entir chuan Ayesha pawh in a tirah maimawm ril zam vel mai mai ni ah a ngai in alo thu tak pui lem lo. Amaherawh chu chiang zawk a a en hnu chuan hlimthla hmel ngei a ni tih a hmuthiam.
A fate hnen ah thlalak chu an khawih danglam em tia a zawh pawh in a fate chuan engtin mah an tih loh thu leh an lakna ngai chiah a nih thu in an tang ve tlat a, Ayesha hian amah ngeiin thlalak dang ah photo editing tool hmang te a khawih danglam vel a tum chhin pawn a theih tak reng reng loh vangin a fate chuan dawt an sawi lo tih a ring nghet hmiah.
Thlalak hi Social Media ah a phochhuak a, thil thlen dan te a tarlan hnu in mitam tak ngaihdan a in ang lo nual hlawm a, ringtu leh ringlo tu pawh an inzat viau a ni. Thenkhat chuan thiam tak leh awm ang thei tur a khawih danglam ngei ni ah an ngai. Ayesha erawh chuan a fate thil tawn atang hian thlarau hi an awm ngei a ni tih a rin thu a sawi a ni.
