US a piang China a khawsa mek hmeichhe pakhat Rachel Waters chuan chin hriat loh a awm a bialpa chanchin hriat tuma a zawn hnu ah a chanchin a hriat leh hmasak ber chuan a rilru leh thinlung tihnat sak tu mai a ni ta si.
Tarlan danin Rachel Waters bialpa Paul McGee hi kumin April thla khan China chhuahsan in UK pan in a chhuak a, kir leh thuai tura an inthlah laiin Paul hi a let leh tawh lova, chanchin hriat zui tur awm lovin a khuangcher bo ta hmiah ani.
China a chhuahsan atanga chawlhkar 6 a liam hnu ah pawh a biakpawh theih tak loh vangin Rachel Waters chu a ngaih a tha lo a, a bialpa chanchin hriat tumin Social Media ah chuan post a siam phah ta hial.
Norwich community Facebook group ah chuan Paul nen an chanchin hi tarlangin khawi ah nge a awm tih leh a chanchin tu emaw talin an hrilh theih hram a beisei thu a sawi a, a chungah thil tha lo a thleng palh ang tih te alo hlauthawng hle ani.
Rachel Waters thlalak phochhuah lo hmutu chuan Paul chanchin chu alo hrilh a, Norwich ah nupui nei leh tawh in a nupui leh fate nen an khawsak mek thu a sawi ani. Rachel Waters hian alo rin em em leh a kianga let leh mai tura a ngaih a bialpa chanchin a hriat chu a beisei loh lutuk thil anih vangin a rilru leh thinlung a tih natsak viau.
A bialpa chanchin an hrilh hnu ah post a siam pawh a delete zui nghal a, Facebook ah phatsan leh bum a nih dan chu a tarlang bawk. A chanchin a darh hnu ah mitam takin a bialpa hi an dem nasa hle. Paul thian pakhat in a sawidan chuan Shenzhen, China ah hian Paul hi hna thawk in a awm a, hripui leng vanga tangkhang in Rachel nen hian an intawng a, an inkawp chho ta niin a sawi.
