India ram ah thil thleng duhawm lo tak hriat niin BJP leader Seema Patra chuan a chenna in a a chhawr lai awmpui hmeichhe pakhat kum 29 a upa Sunita chu nasa taka sawisa in alo nghaisa thin tih hriatchhuah a ni.
Seema Patra hi IAS officer chawl tawh nupui niin BJP leader a ni bawk. Mahse a awmpui a nghaisa tih hriat a nih hian suspend a ni a, August 31 khan Jharkhand police ten an man.
Hrehawm taka a siam leh a nghaisak Sunita hi tribal a ni a, Gumla district a thingtlang khua a mi a ni. August 22 khan IAS Maheshwar Patra leh Seema te chenna in atang in dinhmun tha lo leh bawrhsawm tak in an chhanchhuak.
Sunita hian a sawi dan chuan a pi Seema Patra hian iron rod hmang in a ha a tihbal sak a, bungbel sa tak tak hmang a hlap in a taksa a ti kang bawk. Hei bakah zûn liak tur ten a ti a, a lei (tongue) hmang a inthiarna toilet a tihfai tir bawk nia tarlan a ni.
Tui leh ei tur pawh pe lovin room chhung ah kalh khung a ni a, Rajendra Institute of Medical Science (RIMS) ah Sunita hi enkawl niin a tawrhna vang hian tawng pawh a harsat in kal pawh a kal thei lo. RIMS a enkawltu Doctor te pawh in ngaiawh a thachhuak leh tur chuan hun ala duh tur thu an sawi bawk.
Patra te chhung hian an awmpui Sunita hi kum 10 liam ta khan an chhawr tan a, kum 8 zet a rei tih duhdah leh nghaisakna hi alo tuar a ni.
